شباب الثورة فين

شباب الثورة فين؟ محدش سأل نفسه السؤال ده؟ فين الشباب بتوع ثورة 25 يناير فين الحماس الي كان واخدهم،فين مطالبهم!

-الواحد مكنش مصدق اساسا ان الثورة دي كانت ممكن بأي شكل من الأشكال تنجح كله كان في دماغه بيقول هتبقى زي اي حركة اتعملت قبل كدا وبتفشل، كنت ساعتها في اولى ثانوي وكان علينا امتحانات نص السنة بس عشان 25 يناير ده عيد الشرطة فكان فيه اجازة رسمية من الامتحانات. وكان ليلتها حبيب العادلى طالع على برنامج والمذيع بيقولوا بكرة في شباب نازلين مظاهرات وكان ردوا "دول نازلين يحتفلوا بعيد الشرطة" وفعلا احتفلوا بيه بس على طريقتهم وبدأت الثورة وبدأت الشرطة في التعامل بالميه والمسيل كان كل الناس برده لسه بتقول هما يومين والعيال دي هتتلم والتلفزيون المصري طبعا كان في غيبوبة عن الي بيحصل ولا جايب اي حس او خبر عن ميدان التحرير وفجأه كدا الموضوع بدأ يكبر والشرطة مقدرتش تسيطر عل موضوع وقطعوا النت وشبكة الموبايلات وموقعة الجمل وهوب التلفزيون المصري حس ان في حاجة ناقصاه تقريبا مش واخد باله منها وبدأ المذيعين الي هما هما موجودين دلوقت يقولوا ان الثورة دي مؤامرة وبدأوا يستضيفوا ناس ويقولوا انهم اتدربوا في أمريكا وبتاع
-وضع البلد والناس بقى تحس ان البنزين شم النار وولع بقى كل الكبت والخوف راح وبدأت الناس الكبيرة تنزل مع الشباب وبيفتخروا بيهم وبدأت الناس تموت والشرطة انسحبت والبلطجية طلعوا واللجان الشعبية اتعملت ومبارك اتنحى ومكنش حد مصدق ان ده فعلا حصل!!!

-ويوم ورا يوم كان الناس الكبيرة تقعد تقول الشباب هم أمل هذه الأمة الشباب هما المستقبل والإعلام الوسخ بدأ يمجد الثورة ويطبل وكان مطالب الناس هي "عيش حرية عدالة اجتماعية " وبدأت الثورة تاخد مجرى تاني مختلف عن الشباب توقعوه وحلموا بيه وبدأ ظهور التيارات السياسية وبدأت التيارات دي تبيع في الثورة من أجل المصالح الشخصية وكان من اولهم جماعة الاخوان المسلمين بعد ما باعوا الثوار في محمد محمود وبدأت الناس تشتم في الشباب ويقولوا انتم لسه عيال ومش هينفع تعملوا حاجة
وواحده واحده بدأ الشباب يقلوا وبدأ كلامهم يقل وبدأت مطالبهم تختفي وبدأ دورهم يموت فالجواب على شباب الثورة راح فين فالاجابة هي
1 الشهداء الي ماتوا الله يرحمهم
2 الشباب الي قالت الشعب ده مفيش فايده فيه ونركز في مذاكرتنا وشغلنا ونخلع من البلد دي
3 الشباب الي باعوا ضميرهم وعرصوا للنظم عشان ياخدوا مناصب
4 الشباب الي زهق وانضم لحزب الكنبة
5 والقلة القليلة الي لسه بيكافحوا من أجل حلم الثورة وحق الشهداء الي ماتت.